（內容已更新！）墮入聯儲局迷霧🌁還是看穿棋局？(短片版）

一場席捲全球嘅經濟迷霧，聯儲局深陷其中，迷失方向。 

而另一邊，又可能係一場精心計算嘅棋局，由特朗普親手佈下。 

當成個市場因為「滯脹」呢個凶兆而擔心嘅時候，我點解會將佢睇成，係一場必要嘅外科手術？ 

二零二五年，最重要嘅投資劇本，我即將為你，逐層解構。 

2025年6月18日，聯儲局主席鮑威爾，喺記者會上承認決策委員會內部，對未來利率路徑存在巨大分歧。佢嘅發言，同一份發出不祥訊號嘅報告，構成咗一個極度矛盾嘅畫面。

份報告表面睇，絕對係一份令人憂慮嘅警報： 聯儲局宣佈維持利率不變，但內部投贊成票嘅鷹派官員激增，幾乎同鴿派平分秋色，顯示內部矛盾已經白熱化。 更重要嘅係，佢哋同時下調美國經濟增長預期，但又反手調高失業率同通脹預期。 

經濟增長向下，通脹同失業向上。呢個組合拳，喺傳統經濟學上，有一個非常嚇人嘅名詞，叫做「滯脹」。 簡單嚟講，就係經濟停滯，但通脹高企，一方面百物騰貴，另一方面失業率仲要上升。對普通人嚟講，係最壞嘅情況。

對於習慣舊思維嘅市場觀察家嚟講，這份報告就係「滯脹」即將降臨嘅凶兆。

但，鮑威爾口中輕描淡寫嘅一句「不確定性」，同呢份指向「滯脹」嘅報告，究竟係市場即將失控嘅訊號，定係有人精心佈下嘅迷霧？

當主流市場為呢個「滯脹」凶兆而擔心，而我就認爲更像是指向一個截然相反嘅結論：呢場唔係災難，而係一場可控嘅壓力測試，一場旨在重塑美國國力嘅外科手術。聯儲局嘅困惑，只係因為佢哋用緊一張舊地圖，去導航一片已經被特朗普徹底改變嘅新大陸。

今日，所有投資者面前，都放住兩個截然不同嘅劇本：

•  聯儲局劇本： 恐懼。關稅同地緣衝突，將觸發失控滯脹，經濟衰退，市場崩盤。
•  特朗普劇本： 機遇。所有衝擊都係短暫、可控嘅手術陣痛，目標係一個更強大嘅美國。短暫波動後，持續向上並且破頂。

要選擇信邊個劇本，我哋必須拆解棋局嘅每一步。